Hoyga Barashada Tawxiidka

www.towxiidka.com

  
  
  
Get Adobe Flash player

Dadka booqanaya webka

We have 56 guests and one member online

(1) Qasadka:

1)  Waa kitaab naseexa u batiyo,                                       naar ka digiddeede

     Nuxurkiisa oo idilna waa,                                              raaca Nebigii e

     Nusuustii qur'aankiyo cilmiga,                                        nuurki baxayaa e

     Niyaddoo hanuuntuu Ilaah ,                                           ku naxariistaa e

 

2)  Nasab lagu dhashay moodayaan,                                  nuurki soo degey e

     Naqshad quruxle oo laysku nabo,                                  amase naanayse

     Kufrina waa nasiibsanahayaan,                                     ayan nacahayne

     Gaalada najaasowdey bay,                                           daba nashleeyaane

 

3)  Wadaadkii naseexadi gabyoo,                                       naar afuuf noqoye

     Naska wuxuu u leexinahayaa,                                        nafac adduunyaade

     Nidaamyada cilmaaniyada buu,                                     nolol ka raadshaa e

     Nacamna waw yiraahdaa hadday,                                 naar ku ururaane

 

4)  Nasaariyo Yahuudduba xaq bay,                                   ku nasab sheegteene

     Waa kuwa nusuustii Alliyo,                                            sheegtay nabiyaale

     Inay nabad galeenoo Jannada,                                     ku nasan doonaane

     Waxay Naar u gelayaanna waa,                                    Nabi khilaafkii e

 

4)  Nimaan garannin nooceeda bay,                                   dunidu naafaayne

     Waa wax naaqusaayoo la waa,                                     nimay u joogtaa e

     Waa naaso kaa guri adoo,                                            nuugayoo raba e

     Nurka da'aya weeyiyo sidii,                                           naqakan roobeede

 

5)  Geerida an naxariisan baan,                                         nafarna deyneyne

     Waa u wada nuglaadaa khalqigu,                                  nabarradeedii e

     Nahaabkii naflaha baaba'shiyo,                                     naagahaw simane

     Nin walboo ninnimo sheegan jirey,                                 nuuxsan kari waaye

 

6)  Meelaan lagu nagaanaynin baan,                                  nolol ku beerraa e

     Markii uu naqeedii baxaa,                                             nala kaxaystaa e

     Waa layska nixiyaa markaan,                                        nacam niraahnaa e

     Calallada nashiran waxan ahayn,                                   nooma harayaane

 

7)  Nabad li'ida waa lagu ogyahay,                                     nolol adduunyaade

     Ninkii weligi naashnaashi jirey,                                       bay is nacayaane

     Nood iyo wuxuu nool lahaa,                                           neef ka wadan waaye

     Nuurkii ka samiryoo qabrigu,                                         ma laha naacow e

    

8)  Nin adduun ku noolow maxaad,                                     naallo filataa e

     Nishaab baa ku saarane maxaad,                                 nabad caweysaa e

     Adigaa nuglaadaye maxaad,                                         daara nabataa e

     Maxaad naaxinaysaa aduu,                                          nacashku kuu yaale

 

(2) Diinta:

1) Jifo iyo qabiil Diintu waa,                                               jaad ka gooniya e

     Jinsi aad u dhalatiyo tilmaan,                                        joogi ma ahayne

     Waa jideyn la raaciyo naftoo,                                       lala jihaadaa e

     Haddii aadan jeedaalineyn,                                           waa wax kaa jaba e

 

2)  Waa jiduu Jaliilkii dhigoo ,                                             jeexay waa hore e

     Jidgooyaana taal iyo Ibliis,                                            jeysh u leeyahaye

     Mid ku joogi jireyoo mar kale,                                        jeensadaad arage

     Jaa’irkii nebcaan jirey marbuu,                                      khayr ka soo jirine

 

(3) Jahli baa dad badan jeediyoo,                                       ku jira mooyaane

     Jidku waw jid nabadeed ninkaan,                                  jar iska tuurayne

     Jaanib kaan u sii jeensan buu,                                      jannada geeyaa e

     Jaaxidkii lunshana Jahannamay,                                   jaasadii tahay e”

 

(3) Iimaanka, Islaamka iyo tawxiidka:

     Iimaan waa awoodaha Alloo,                                         la ictiraafaa e

     Isu dhiibid weeyiyo inaad,                                             amarki raacdaa e

     Aadane wax loo uumay waa,                                         inay islaamaan e

     Istiqaama mooyee wax kale,                                         kuma abbaarrayne

 

     Aadane itaal yarida waa,                                              lagu abuuraa e

     awood aan Ilaah siinahayn,                                           lagama eegeyne

     irsaaq loo abuuraayo buu,                                             ku intifaacaa e

     haddii uu addoon yahay muxuu,                                     amar u diidaa e

    

     afna ma aha Iimaanku iyo ,                                           erey la sheegaa e

     aqoon uurka taalliy acmaal,                                           ururta weeyaane

     afkuna waa ayidiyoo waxaad,                                        aamintaad orane

     saddexdaa markaad ebido buu,                                    kuu ansaxayaa e

 

     Ibliiskaba oraah uu ka tegey,                                         laguma eedeyn e

     ashahaadayoo, aakhirana ,                                           waa ogaan jirey e

     waxse eel qabsaday waa markuu,                                 diidey amarkii e

     isla weynidii baa hoddiyo,                                              asal ku faankii e”

 

     Rabbi amarradiisiyo adoo,                                             aayadaha diidi

     Iimaanka aad sheegataa,                                              waa af iyo beene

     Waa ammaanidii reer Yahuud,                                       ku ibtiloobeene

     Is ilaali abidkaa intii ,                                                     iilataa badane

 

     Islaamnimana waa erey ku bari,                                     laba umuuroode

     mar iimaanka weeyoo waxbaan,                                    haatan kaa iri e

     addin iyo af iyo waa adoo,                                            uur hoggaansama e

     amarrada Ilaaheen farood,                                            wada addeecdaa e

 

     marna waa astaan aan la dilin,                                      axadki muujaa e

     Hadduu uurku gaal yahayna uu,                                     kaa ammaan heli e

     waa ereyga towxiidka oon,                                           wadan Ishraaggii e

     inqiyaad la daahirinayoon,                                             amar la diideyne

 

     “laa Ilaaha illa laahu” waa,                                             asalka tawxiide

     haddii ay ikhlaas wadato bay,                                        ku anfacaysaa e

     shirki looga iilanahayiyo,                                                eheladiisii e

     haddii kale  oraah weeye aan,                                       uurka kaa jirin e

 

     Ashahaado aan wadan ikhlaas,                                     ma aha iimaane

     Mar hadduu ishraak jiro waxaa,                                     lumi oraahdii e

     Waa eber acmaashuu faloo,                                         ma ansaxaayaane e

     Inna kuuma reeboo shirkigu,                                         waa abaar kulule

 

(4) Aakhiro:

     Aakhiro nimaan aamineyne,                                          waa ardaal lumaye

     ayaan lays abaal marinayoo,                                        uunku wada joogo

     akhbaartii “Ilaah” weeye iyo,                                         ereyadiisii e

     addin iyo af iyo uurba waa,                                           la aqbalaayaa e

 

     nin adduun is raacsheyi inuu,                                         eedi baa dhigane

     waa daar ibtilo loo dhisiyo,                                            eegid iyo daale

     ictiqaad saliimiyo acmaal,                                              ururso mooyaane

     eber weeye baaddila waxaad,                                       ku ijtihaadaa e

 

     ruuxaan cilmiga eegahayn,                                           waa anbanayaa e

     ayaamahakan loo tirinayuu,                                          abaddan moodaa e

     ajashuu illaawaa inuu,                                                   iilku dhow yahay e

     goor aan baryada la asmacayn,                                    buu Allow orane

 

     Aadane ashqiya weeye iyo,                                           ehelu khayrkii e  

     Mid iimaan la guuroo jannada,                                       aqalki yaallaa e

     Iyo ololka naareed midkii,                                              lagu illaawaayey

     Waa intii Ibliis raacday iyo,                                            ururki naareed e

 

(5) Malaa’ikta:

     malaa’igi Ilaaheenna bay,                                              amarki raacaane

     wixii lagu ogaa oo dhan bay,                                         wada ebyaayaane

     aadane sidii laguma arag,                                             midaan addeeceyne

     caasi kama imaanaayo oo,                                           waa askar Ilaahe

 

     iftiin baaba laga uumayoo,                                            iilan mahayaane

     adkaar bay illeyl iyo dharaar,                                         ku ijtihaadaane

     aadane acmaashiisa baa,                                             laga adeejaa e

     wixii lagu iqdaamtoo dhan bay,                                      ururinaayaane

 

     anbiyada farriimaha Allaa,                                             loogu aaminaye

     inna kuma daraan ereyadii,                                           loo akhriyo goore

     “Jibriil” waad ogaateen inuu,                                          ruux amiin yahaye

     hadii loo idmana gaaladuu,                                            asal jaraayaa e

 

(6) Rumeynta Rususha:

     Anbiyaduna aayada Allay,                                             ku ayidnaayeene

     Aadane la diray weeye iyo,                                           duul la aamineye

     Ictiqaad saliimiyo axkaam,                                            bay akhriyayeene

     Islaamnimada loo uumay bay,                                       uunka barayeene 

 

     Muusa baa alwaax loogu dhigay,                                   ereyo Tawraade

     Injiiliyo Furqaaniyo Zabuur,                                            waa la aamini e

     Rabbi weeye aayadihi iyo,                                             amarradiisii e

     Axadkii ka iishaana waa,                                               ehela naareede

 

     ruux aan risaalada rumeyn,                                           raacyey gaalada e

     rag la diray rusushu weeye iyo,                                     duul Ilaah rabey e

     mid waliba runtii buu u sidey,                                        reeruhuu yahaye

     Rabbi raaca keligii shirkina,                                           reeba buu yiri e

 

     mid waliba rafaad buu maroo,                                       reero la collowye

     dadku ru’asadoodii luntay ,                                            tala ku raaceene

     ra’yi xumi la eedyoo ku dhece,                                       raranka naareede

     runtay diidayeen bay jannadi,                                        rug uga waayeene

 

     Risaalada rasuulkeenna baa,                                        raacitaan mudane

     Reera gaara lama siinnin ee,                                         waa raxma Ilaahe

     Raad go’ina maysoo inay,                                             raagi baa dhigane

     Rag rumeeya lama waayayoon,                                    cidi ka raynayne

      

(7) Rumeynta Kutubta:

     kii aan kitaabbada rumayn,                                           kaafir buu noqone

     Qur’aankaa kariimka ahna waa,                                    ugu korreeyaa e

     kufrigii kitaabbada galuu,                                              ka warramaayaa e

     kala saare weeyoo wixii,                                              kadiba noo sheegye

 

     kelmed iyo macnaba uunka waa,                                   kii ka yaabiyeye

     karti iyo karaan uma lahoo,                                           keeni kari waaye

     kelmadaha kuwii toosin jirey,                                         buu kasbaday waa e

     kulligoodna waa qirahayeen,                                         inu korreeyaa e

 

(8) Shirkiga:

     haddii aan “Ishraak” kuu fasiro,                                     aafo waysaga e

     amar diiddo weeyiyo adoo,                                           dhega adkaadaa e

     adigoon addeecayn “Ilaah”,                                           amarradiisii e

     ku arrimiya aaraa’ dad iyo,                                            odayo xeerkoode

 

     ama waa awood laga ag dayo,                                      midaan itaal hayne

     awoowiyo ashyaakh iyo adoo,                                       awliyada tuuga

     awood muuqatiyo laguma arag,                                     waxay abuureene

     idinna looma haystee maxaa,                                        nimanka loo aaday

 

     “Uumaha” Ilaaheenna baa,                                            loo addoon yahay e

     Andaad looma yeeliyo insaan,                                       amarki joogaa e

     Adoo aayad kuu timid ha dhugan,                                  niman aqwaashoode

     Ilaah iyo addoon wada addeec,                                     waa ishraaggaba e

 

     Axadkii intaa lagu ogyahay,                                           ma laha iimaane

     “islaamnimo” ka guuryoo makhluuq,                               buu Ilaahsadeye

     “Ilaah” loogu yeeriyo qur’aan,                                        amarki mooyaane

     waxba yaan addoonkaa la sirin,                                    iiley waa hore e

Copyright © 2013. All Rights Reserved. www.towxiidka.com